Framarar sukku að öxlum í Safamýrina

Víkingar krýndu sjálfa sig sem sigurvegara A-riðils Íslandsmótsins með stórsigri yfir Fram í Safamýrinni í kvöld, 1-8. Það þarf eiginlega ekkert að segja um leikinn annað en að spuningin var aðeins sú hve mörg mörg Fram fengi á sig á heimavelli og þau reyndust fjögur í fyrri hálfleik og önnur fjögur í þeim síðari. Fram náði að klóra í bakkann með ágætu marki í síðari hálfleik. Aron Elís og Ólafur Andri skoruðu í tvígang hvor en Robbi, Patrik, Davíð Örn og Röggi skoruðu sitt markið hver.

• Víkingar enduðu riðlakeppnina með 35 stig eftir 14 leiki. Þeir höfðu sigur í 11 leikjum, gerðu tvö jafntefli og töpuðu einum leik.
• Víkingar  skoruðu alls 47 mörk og fengu á sig 13, markareikningurinn var því jákvæður um 34 kvikindi.
• Breiðablik, sem er í öðru sæti riðilsins, skoraði líka 47 mörk en fékk 21 mark á sig og reikningur liðsins er því jákvæður um 26 mörk.

Til hamingju strákar með áfangann, þið eruð auðvitað langflottastir!

Þetta er samt bara áfangasigur því nú blasir sjálf úrslitakeppnin um aðra helgi. Breiðablik mætir grönnum sínum í HK í undanúrslitum, sigurvegara í B-deildinni en Víkingur mætir sigurvegara í úrslitakeppni efstu liða í C-deildunum þremur og þess liðs náði bestu árangri í öðru sæti.

• Nokkrar myndir úr Safamýrinni

Liðið gegn Fram

Lokaleikur A-liðsins okkar á Íslandsmótinu verður gegn Fram verður í Sogamýri kl. 17:00 í dag. Þjálfari vor kveður fleiri til leiks en komast á leikskýrslu. Ástæðan er sú að meiðsl hrjá menn í hópnum og því verður ekki unnt að stilla upp liði fyrr en á síðustu stundu.

Eftirtaldir mæti á Framvöllinn kl. 16:00:

• Hlynur, Villi, Röggi, Daníel, Ólafur Ægir, Patrik, Jón Reyr, Bjarki, Davíð, Aron Elís, Agnar, Ólafur Andri, Fjölnir, Steinar, Róbert, Bjössi og Magnús.

Víkingar hafa tryggt sér toppsætið í A-riðli. Þeir eru jafnir Blikum að stigum en með betra markahlutfall. Ætlunin er að sjálfsögðu að sigra Fram og vera með afgerandi forystu í riðlinum. Fram er í botnsæti riðlisins með aðeins eitt stig. Liður hefur með öðrum orðum landað einu jafntefli í sumar en tapað í öllum öðrum leikjum og getur ekki búist við því að Víkingar gefi þeim eftir viðbótarstig í dag.

A-liðið sigurvegari riðilsins eftir jafntefli við Blika

Víkingur er sigurvegari A-riðils Íslandsmóts 3. flokks og Breiðablik fylgir Víkingum í úrslitakeppnina. Liðin skildu jöfn í Víkinni í toppslag riðilsins í kvöld, 2-2. Víkingar máttu afar vel una við þá niðurstöðu en Blikar hurfu hins vegar súrir á braut. Hvort lið á eftir einn leik í mótinu en Blikum dugir ekki sigur þar, þrátt fyrir að Víkingi dytti í hug að tapa, til að komast í efsta sætið.

Víkingar sigruðu svo Breiðablik nokkuð örugglega í B-leik kvöldsins, 2-0, en ná ekki inn í úrslitakeppnina.

Víkingar áttu undarlega slæman dag í A-leiknum, virkuðu stressaðir og lausir við baráttugleði frá upphafi til enda. Blikar mættu á hinn bóginn býsna vel stemmdir til leiks og voru hársbreidd frá því að fara heim með þrjú stig. Bæði lið fengu nokkur fín færi í báðum hálfleikjum og það voru Víikingar sem komust yfir í fyrri  hálfleik þegar Viktor stangaði boltann í netið. Einungis fáeinar mínútur liðu hins vegar þar til Blikar jöfnuðu og þeir komust svo yfir í síðari hálfleik, sem var fyllilega í samræmi við gang mála á vellinum. Víkingar voru svo rausnarlegir, hvað eftir annað, að gefa gestunum tíma og rúm til að athafna sig framan við Víkingsmarkið. Um hríð í seinni hálfleik réðu Kópavogsstrákarnir lögum og lofum á gervigrasinu fína og ósigur heimamanna blasti við. Það var svo Róbert Rúnar sem blessunarlega jafnaði leikinn með skalla upp úr hornspyrnu á lokamínútunum. Víkingar fögnuðu niðurstöðunni sem sigri en fyrir Blika jafngilti jafnteflið hins vegar tapi. Verulegar líkur hljóta að vera á því að þessi lið mætist í úrslitaleik Íslandsmótsins í september og þá er eins gott fyrir Víkinga að mæta til leiks með hausinn í lagi og vel reimaða skó!

B-lið Vikings átti einn besta leik sinn í sumar gegn Breiðabliki í kvöld og gaf til kynna strax í upphafi að það hygðist fylgja eftir fræknum sigri gegn öðru stórveldi úr nágrenni Reykjavíkur hér um kvöldið, FH. Víkingarnir voru bæði sókndjarfir og baráttuglaðir en vörðust líka vel. Blikar áttu eitt hættulegt skot á markið í fyrri hálfleik, sem var varið í horn. Meira sköpuðu þeir sér ekki af viti í öllum leiknum. Agnar Darri skoraði um miðjan fyrri hálfleik og í loftinu lá að það mark myndi duga en dæmin sýna að slík forysta er bæði tæp og brothætt. Þegar Ólafur Andri bætti við marki í síðari hálfleik var engin spurning um lyktir leiksins. B-liðið hefur þar með lokið sínum leik í Íslandsmótinu og er komið með 19  stig.

Viktor Jóns er enn í sæti markakóngs A-liða, með tíu mörk. Næstur honum kemur Árni Vilhjálmsson úr Breiðabliki. Þeir skoruðu sitt markið hvor í kvöld. Á hæla þeim kemur Ragnar Bragi Sveinsson úr Fylki með 8 mörk og þar á eftir Aron Elís með 7 mörk. Það er því stóra spurningin hver þeirra reimar á sig réttu markaskóna í lokaleikjum Íslandsmótsins.

A-lið Víkings mætir sigurvegara C-liða í undanúrslitum fimmtudaginn 9. september. Efstu lið þriggja C-riðla leika um sætið í úrslitakeppninni í byrjun september og þar verður líka það lið í 2. sæti sem best stóð sig í mótinu. Þetta verður sum sé fjögurra liða mót og sigurvegarinn mætir Víkingi í undanúrslitaleik. Líkur benda til að kandídatar í mótherja Víkings verði Breiðablik 2, Afturelding, sameiginlegt lið af Norðurlandi vestra (Sigló+Sauðárkrókur+Hofsós) eða Reykajvíkur-Þróttur.

Andstæðingur Blika í hinum undanúrslitaleiknum 9. september verður líkast til Haukar úr Hafnarfirði.

• Myndir úr leikjum kvöldsins

Blikaleikirnir í Víkinni

Breiðablik mætir í Víkina síðdegis til leikja við Víkinga í Íslandsmótinu. Svo vill til að bæði Víkingsliðin eru sem stendur í öðru sæti í sínum riðli og í A-riðli eru Víkingar á toppnum, öruggir um sæti í úrslitakeppninni í september. Breiðabliksleikurinn er tólfi og síðasti leikur B-liðs Víkings í Íslandsmótinu og næstsíðasti leikur A-liðsins. Sá síðasti verður gegn Fram á Framvellinum á mánudaginn kemur, 30. ágúst.

•  A-liðið mætir kl. 15:45 og leikurinn hefst kl. 17:00 í Víkinni.
  • Hlynur, Villi, Rögnvaldur, Hörður, Sverrir, Patrik, Jón Reyr, Róbert, Davíð, Aron Elís, Viktor, Ólafur Andri, Agnar, Ólafur Ægir, Bjarki og Eyþór.
•  B-liðið mætir kl. 17:45 og leikurinn hefst kl. 18:30 í Víkinni.
  • Halldór, Sigurður, Daníel, Fjölnir, Magnús, Jóhann, Emil, Gunnar, Óli Þór, Þórarinn, Steinar, Lárus.

Undanúrslitaleikir í Íslandsmóti 3. flokks verða síðdegis  fimmtudaginn 9. september og úrslitaleikurinn kl. 12 á hádegi sunnudaginn 12. september, ef marka má heimasíðu KSÍ.

Steinar Ísaks í landsliðsúrtaki

Steinar Ísaksson, liðsmaður vor í þriðja flokki Víkings, hefur verið valinn í hóp sem tekur þátt í úrtaksmóti Knattspyrnusambands Íslands á Laugarvatni um næstu helgi, 20.-22. ágúst.  Þjálfarar U-16 landsliðsins völdu hóp stráka úr félögum héðan og þaðan af landinu og Steinar verður þar sem sagt fulltrúi Víkings. Þessir strákar eru allir fæddir 1995.  Til hamingju með áfangann, Steinar!

FH-ingar sendir stigalausir í háttinn

Víkingar gerðu það gott í Kaplakrika í kvöld og sneru heim með 2 x 3 = 6 stig eftir sigur í báðum leikjum. B-leikurinn jafnaðist á við besta þriller í bíósal og rúmlega það.

Markalaust var í hálfleik A-liðanna og raunar máttu Víkingar þakka fyrir þá stöðu. Í síðari hálfleik fóru Víkingar að bíta meira frá sér og Aron Elís skoraði í tvígang, í fyrra skiptið úr þvögu framan við FH-markið en í síðara skiptið beint úr aukaspyrnu sem dæmd var vegna brots á Patriki. Flott skot í markmannshornið.

B-lið Víkings var ágætlega inni í fyrri hálfleiknum en fór illa með færin sín. FH-ingar nýttu hins vegar færi sem þeir fengu og skoruðu í tvígang, fyrra markið var sérlega glæsilegt, sláin inn. Staðan í hléi var 2-0 og gengi okkar manna fram eftir hálfleiknum benti ekki endilega annars en þess að FH-ingar sigldu á topp riðilisins með sigri á Víkingum.

Svo fóru hlutirnir að gerast og það með látum. Agnar Darri komst einn inn fyrir og skaut beint á markvörð FH úr dauðans dauðafæri. Hann bætti fyrir ólán sitt andartaki síðar með því að klára færið á sinn hátt og skoraði aftur skömmu síðar af löngu færi, glæsilegt mark.

Allt í einu var staðan orðin 2-2 og FH-ingar tóku við sér. Þeir áttu sóknir og dauðafæri en Halldór varði og varði. Inn fór boltinn ekki en hins vegar náðu Víkingar sókn undir lokin og Ólafur Andri skoraði sigurmarkið. Strákarnir stigu stríðsdans, enda sætasti sigur B-liðsins í sumar í höfn. 

Dómari B-leiksins var góður og dæmdi vel. Þetta skipti Víkinga miklu máli því FH-ingarnir í hlutverki aðstoðardómara voru skandall. Þeir höfðu aftur og aftur bein áhrif á gang leiksins með rangstöðuflöggunum sem höfðu þann tilgang einan að bægja hættu frá FH-markinu. Annar snillingurinn reyndi svo, þegar allt annað þraut í síðari hálfleik, að fá dæma vítaspyrnu á Víking en dómarinn vatt réttilega ofan af vitleysunni. Það á nú að vera alveg nóg í leik á Íslandsmóti að mæta ellefu manna liði á knattspyrnuvelli þó ekki bætist við tveir línuverðir líka.

Á-liðið er eftir leiki kvöldsins í efsta sæti riðilsins. Það náði góðu forskoti á Breiðablik því þau tíðindi bárust af Versalavelli í kvöld að Stjarnan hefði skellt Blikum þar 0-2! Víkingar eru komnir með 31 stig eftir 12 leiki en Blikar eru með 25 stig eftir 11 leiki. Blikar eiga eftir báða leikina við FH og svo leikinn við Víkinga í Víkinga í næstu viku. Víkingar eiga eftir útileik við Fram og svo Blikaleikinn.